مشيت لحدا الباب..

أنا : شكون
الصوت : أنا.. حل أعدنان

عرفتو شكون.. 
حليت الباب و لقيت ختي راضية لي مازال ما شفتهاش.. 
سلمت عليها و دخلنا..

أنا : ملي مشيتي لعند أم مزلوف ما رجعتي للدار
راضية : ههه.. ايوا ما عندي ما ندير.. فيما نلقى شي 
وقيت نرتاح فيه كا تجرني ختو لحاجة اخرى.. يا انت لاباس ؟ 
على سلامتك
أنا : الله يسلمك.. كنت نيت غادي دابا لدار الضيافة نتعشى مع الدراري
راضية : مشيت سولت عليك فيها كال ليا عمي غا تكون هنا.. واش 
بصح غا تولي تبات فدار عمي حساين ؟
أنا : أييه.. وصاني نقابلها و كلت علاش ما نبات فيها.. منها 
مقابلها و منها نتفرج فالتلفزة و ملي نفيق نجي 
للدار أولا فوقت الماكلة
راضية : واخا أخويا الله يعاونك.. أنا غادا نرجع لعند امي لا يحتاجوني
أنا : بلاتي.. غا نسد الباب و نخرج معاك.. راني بغيتك لواحد المهمة

خرجنا و سديت الباب و مشينا جهة دار مزلوف..

راضية : اشنو هي المهمة لي بغيتيني ليها أعدنان ؟
أنا : بغيتك تستدرجي ليا رباب
راضية : "مستغربة" شكون رباب ؟
أنا : شكون من غيرها القافزة الفاهمة لي كاتكول للنجمة هبطي 
ليا من بلاصتي..؟ 
راضية : رباب بنت سي الكرواعي ؟
أنا : أييه
راضية : "مخنزرة" و لاش بغيتيها ؟ و أش كا تقصد بنستدرجها ؟؟!
أنا : هههه.. ما يمشيش خيالك بعيد.. ما قصدتش داكشي لي غطس 
فيه دماغك
راضية : ايلا ما قصدتيش.. شرح ليا نفهم
أنا : واخا هي الأولى

كملنا طريقنا و أنا كا نعاود ليها الهدف من مرافقتها لرباب 
و شرحت ليها التحدي لي بينها و بين كريميطة.. 
ما وصلنا لدار مزلوف حتى قدرت نقنعها تجيبها لدار عمي حساين 
وتافقنا على الوقت لي غا ترجع فيه العروسة من أسايس لدارهم 
و فهاذ اللحظة كا يبدا الجزء الثالث من فلكلور أحواش 
لي كا يتسمع صوتو فالدواور المجاورة..

راضية : و آش غا نكول ليها ؟
أنا : كولي ليها تمشي معاك لدار عمي حساين تجيبي شي 
سخرة لمي و ملي تجيو غا تلقاوني تما، غا نحل ليكم الباب

شافت فيا مستغربة و دخلات لدار مزلوف ومشيت أنا لدار الضيافة.. 
دخلت و لقيت كولشي شد بلاصتو حدا الميادي و الخبز مقطع 
كا يتسناو غير الطواجن يتحطو..يا لطيف.. 
شربو أتاي و كلاو الحلوى.. فلتو ليا.. 

بديت كا نقلب على بلاصة خاوية.. 
فهاذ اللحظة بانت ليا يد كا تشير.. قربت لقيتو كريميطة اللصقة.. لكن.. 
هههه.. ما عندي ما نتسالو.. شد ليا بلاصة..
تعشينا و شربنا أتاي و خرجنا من دار الضيافة لأسايس باش نشدو 
لبلايص المخيرين قبل ما يعمر.. 
فهاذ الأثناء بداو يجيو العيالات من بعد ما تعشاو باش يشدو بلايصهم.. 

شويا بانت ليا رباب جاية مع امها كلسو تقريبا مقابلين معنا حيت 
الرجال بوحدهم و العيالات بوحدهم.. 
بديت كا نقلب على ختي راضية ما بانتش ليا.. بدات جهتنا 
كا تعمر بالرجال و الدراري.. وبعضهم كا يكلس قدامنا 
وضركو عليا رباب..

أنا : نطلعو فوق العتبة ؟ ما بقا كا يبان ليا والو..
كريميطة : كيفاش ما كايبان ليك والو ؟ أسايس كامل قدامك 
و أحواش مازال ما بدا.. حنا لاش جينا الاولين من غير على قبل البلاصة
أنا : أش بغيت أنا شي أحواش.. شوف لهيه

نعت ليه جهت رباب لكن ما بانتش ليه..

أنا : بانت ليك شي حاجة ؟
كريميطة : ما فهتمكش اش كا تخربق.. دوي أصاحبي ولا هنينا
أنا : وقف تشوف و تفهم قصدي يا الدمدومة

وقف كريميطة و انا كا نعت ليه حتى شاف رباب و عاود كلس..

كريميطة : آاااه.. كا تهضر على رباب..؟
أنا : واييه.. راني معول نخرجها منها الليلة
كريميطة : كيفاش ؟ باش من طريقة ؟
أنا : غادي نزعزع ليها القليب فدار عمي حساين وغانغبر ليها 
مومو دعينيها عند بيرهم
كريميطة : "حال فمو" و لكن شكون غا ينوضها لينا من هنا 
وهي غا تبغي تشوف عوايد العروسة و أحواش ؟
أنا : ما تخممش.. طلبت من اختي راضية تستدرجها لينا لدار عمي 
و شرحت ليها كولشي و حتى التحدي لي كان بيناتكم
كريميطة : "بتاسم" توحشنا هاذ المغامرات الظلامية أخويا عدنان 
غير هو..

فهاذ اللحظة ناضو أصحاب أحواش وبدات الطارة والطبل و الدراري كا يشطحو.. 
شفت ف كريميطة..

أنا : "بصوت مرتفع" غير هو أش..؟؟
كريميطة : "بصوت مرتفع" حتى لمن بعد و نكول ليك

نضنا من ذيك البلاصة و مشينا كلسنا على واحد العتبة عالية 
شويا مقابلين مع رباب وفنفس الوقت كا نتفرجو فأحواش 
حتى سالات الرقصة الأولى..

أنا : كول ليا دابا
كريميطة : بغيت نكول ليك بلا ما تستاعن بذاك الكتاب 
الابليسي كيف العام لي فات.. 
غادي غير نصدقو ثاني منوضين شي حرب 
ما ديال تطفيها ما ديال تكملها

يتبع

بانتظار تفاعلكم و آراءكم و انتقاداتكم..

no_sidebar