أنا : هههه.. بنت ليك جن طيار ولا من عمار الدار..؟! 
و باش غا نستاعن من غيرو.. راني ضربت عليه تمارا وشفت 
العجب لي يخلي القلب يخرج من بلاصتو باش نجمع 70 فالمية
من الكتاب و مازال كا تسناني خرجة غا تكون أخطر من لي سبقو.. 
هاذشي كامل لاش فنظرك..؟؟ باش نحطو ديكور..؟؟ 
ما يمكنش طبعا حيت ما كاين لي عارف على وجوده من غيرك
كريميطة : واخا.. متافقين.. ولكن هاذ المرة شوف غير شي 
حاجة خفيفة و ما تأذيش.. راني خايف يعيقو بلي انت 
مول الزبلة ديال العام لي فات ايلا جاب الله وقعات شي حاجة لرباب..

فهاذ اللحظة بدا الجزء الثاني من أحواش وفنفس الوقت بانت ليا ختي 
راضية جاية هي و امي.. نضت و أشرت لكريميطة يتبعني.. 
تمشينا حتى فتنا أسايس..

أنا : غادي نسبقك نحل الباب وغا نخليه مردود.. سير طرك داركم 
جيب معاك 5 د الشمعات و زيزوارا و القلم و الصمغ
ملي تجيبهم تلفت حتى تأكد بلي حتى واحد ما شافك عاد تدخل
كريميطة : ما تحتاجش توصيني.. انت آش غا تجيب معاك ؟
أنا : ما غا نجيب والو.. كنت غا نمشي ناخذ الصفحات من الدار لي فيهم 
التعويذات لكن غا ندير بكلامك و نخدم ديال المرايا لي أنا حافظها 
عنداك تنسى البريكة

بتاسمت ليه و سبقتو لدار عمي حليت الباب ديال السور ورديتو 
كأنه مسدود ومشيت حليت باب السفلية وتسنيت حتى جا كريميطة.. 
دخلنا للسفلية و مشيت جهة واحد المرايا طويلة مغطية بليزار.. 
جريتها لحدا الحيط لي مقابل مع باب السفلية مباشرة وتأكدت مزيان 
بلي المرايا مقابلة مع الباب وأي واحد دخل منو غايشوف جسدو 
كامل حتى للركبة..

عاوت جريت المرايا حتى بعدات على الحيط باش نتمكن 
من الدخول بينها و بين الحيط..

أنا : أرى القلم و الصمغ

مد ليا كريميطة القلم و الصمغ و بديت بتشكيل جدول ب 8 د الخانات 
من خلف المرايا وعمرتو بالحروف المجزأة ورسمت شكل مثلث 
وخططت الرموز السيميائية وبديت كا نفخ فالصمغ باش يكرم دغيا 
و من بعد كتبت جزء عشري من التعويذة الخاصة بالمرايا..

ساليت و خرجت من ورا المرايا ورديتها كيف كانت ملاصقة مع الحيط 
و مقابلة مع الباب.. 
خديت الشمعات بخمسة من عند كريميطة و معاهم الزيزوارا وحطيتهم 
بشكل خماسي على الأرض مقابل المرايا و بديت كانشرط فالشمعات بزيزوارا 
و فنفس الوقت كا نردد بصوت منخفض الجزء العشري الثاني 
من التعويذة حتى بانت لينا حركة خاطفة فالمرايا..

فهاذ اللحظة أشرت لكريميطة يخرج من الباب بلا ما ينطق.. 
خرج كريميطة و أشرت ليه مجددا يرمي ليا البريكة.. 
شديتها و شعلت الشمعة الأولى الوسطانية المخمسة 
وانا كا نردد الجزء العشري الثالث.. 
صقلت شويا لكن.. 
ما صدرات حتى حركة و فهاذ اللحظة سكت صوت أحواش 
لي كان كا يتسمع..

شفت فكريميطة و شير ليا باش نسربي قبل ما تجي رباب مع راضية.. 
رجعت كملت الطقوس و شعلت الشمعة الثانية على اليمين 
وأنا كا نردد الجزء العشري الرابع وبقيت كا نعاود فهاذ المرحلة 
حتى شعلت كاع الشمعات الخمس و رددت الجزء العشري السابع..

دابا وصلت لمرحلة الخلوة ولي خاصني فيها نخرج ونسد الباب 
باش نخلي الشمعات و المرايا بوحدهم لمدة تعادل مدة اعادة 
ترديد الأجزاء العشرية السبعة لكن سرا هاذ المرة..

قمت بالأمر من بعد ما درت القلم والصمغ فجيبي وهزيت 
واحد الشيفونة فالوقت لي رجع فيه كريميطة لحدا الباب ديال السور 
و بان ليا بدا كا يقفقف.. 
ساليت من ترديد الأجزاء العشرية و دخلت بسرعة طفيت الشمعات كاملين 
وجمعتهم من الأرض و خرجتهم معايا وسديت الباب و درت وذني كا نتحسس..

فهاذ الأثناء بالذات سمعت صوت تسخينات الطارة جاي من أسايس 
وهذا كا يدل بلي عوايد العروسة غا يبداو.. 
يعني أن اختي و رباب قراب يجيو..

لهذا.. خبيت الشمعات ورا واحد الشجرة بالزربة ومشيت جهة الباب 
ديال السور حليتو وجريت معايا كريميطة وخرجنا..
سديت الباب و مشينا كا نجريو لجهة البير ديال سي الكرواعي 
لي كان جنب السور ديال دارهم..

أنا : كريميطة توكض معايا را ماشي اللعب هذا
كريميطة "حك عينيه" و شكون كاليك حنا دابا كا نلعبو؟!
أنا : وقف هنا و تقابل مع راس الزنقة ويلا بان ليك شي حد جاي كح و لا عطس

حرك كريميطة راسو و مشيت جهة البير.. 
طلعت الدلو لي كان عامر بالماء وخويتو وقلبتو على كفاه مسحتو بالشيفونة 
و بديت كا نخطط فيه بالقلم و الصمغ.. 
رسمت قطة صغيرة و كتبت على كرشها.. 
الجزء العشري الثامن من التعويذة و أنا كا نرددو بصوت منخفض 
ثماني مرات ثم رسمت مثلث مقلوب وقسمتو على ثلاثة أفقيا و 2 عموديا 
و كتبت فكل خانة حرف.. 
يعني 9 حروف و كانت بهاذ الترتيب..

ن 
ع
 و
 أ
 ك 
غ 
ه 
ث 
ج
و من بعد رددت الجزء التاسع و العاشر من العشرية 
و قلبت الدلو و كتبت فجوفو..

"تعويذة مجزأة"

كنس.. لتشعل.. منصر.. تواده.. تقشعر.. يا.. يا.. وسيطي.. و لا تبال..

ساليت من الكتابة و هبطت الدلو بشوووويا حتى وصلتو للماء وخليتو 
ومشيت لعند كريميطة جريتو و مشينا للدار..

حليت الباب و كلسنا فالجردة مقابلين مع باب الدار السفلية..
بعد لحظات كا نسمعو الدقان فباب السور..😱😲

يتبع

بانتظار تفاعلكم و آراءكم و انتقاداتكم..

no_sidebar