جاني شعور بطاقة خارجية غير طبيعية لدرجة أن صبعان يدي ليسرية 
ثناو و شكلو قبضة غطات على السداسية المرشومة وهذه دعوة 
لإعطاء الإذن بالظهور المجسد.. لكن.. 
ما عندي حتى فكرة على الهيئة لي غا يتشكل فيها "صاموي.."
رغم أني فعلا ما متأكدش بلي هو لي غا يحضر..

حليت عينيا و تفاجأت بدخان كثيف طالع من الشمعات بخمسة 
بسباب الطلسم الغير منقط..

"كما أفنى.. لا تتعالى.. كما أفنى.. لا تعمى.. بك يا.."

و هذا كا يلعب دور البخور لي كا يكونو مفروضين على صاحب 
الاستحضار يوفرهم خصوصا ايلا كان بغا يتواصل مع الخدام السفليين 
كيف باغي ندير أنا الآن..
بديت كا نبركك فالبيت ونقشع وسط الدخان واش غا يبان ليا شي ضيف 
مجهول لكن ما بان ليا والو.. 
لا قطة لا أفعى لا كلب لا طير.. 

 صبرت شويا و أنا صاقل وعينيا على دم الغراب لي نشف أولا بحال 
ورقة البسطيلة حيت ما بقاش لاصق فالأرض.. 
فهاذ اللحظة.. 
سمعت حركة مفاجئة جاية من جهة الحيط لي متكي عليه كريميطة.. 
بقيت صاقل و ما تلفتش.. 
واقيلا كريميطة بدا يفيق..

عاود سمعت صوت حركة أخرى وفهاذ المرة تلفت لقيت كريميطة سرح 
رجليه و حاذر راسو وفنفس الوقت طفات الشمعة الأولى تبعاتها الثانية والثالثة 
و الرابعة.. 
بقات غير الخامسة لي مقابلة معايا.. عاد  تلفت لقيت كريميطة حال 
عينيه لكن بيضين.. مومو لكحل غبر..

هز راسو بشويا و تقابل معايا وكال ليا..

كريميطة : "بصوت غليظ" باسم ملكي.. باعثي لعالم.. الذي سيزول.. أن ألبي 
دعوتكم يا.. الإنسي.. عجل ولا.. بشرط أن تبجل ملكي..

تزعزع ليا قلبي حيت فهمت بلي لي حضر "صاموي.." نفسو 
لكن تجسد من بعد سيطرتو على كريميطة مسكين..

أنا : كل التبجيل والثناء على الملك.. ثالث ملوك العالم السفلي وقائد منطقة 
قمقابيل المعظمة وقاهر العامر والطائر والرحال والعاشق والقار، 
مانع.. ومنظر.. مزلزل الجمر وساحب البساط.. الأسود
صاموي.. : خطط وارشم ولا تنطق
أنا : أنصت ونفذ ولا تعترض
صاموي.. : السمع والطاعة والتنفيذ درءا للحرق والتعذيب

هنا عطى صامويل الولاء ووليت متكم فيه ولي نطقت بيها يديرها لمجرد 
ذكرت الشفرة و لولاها لكان هو المسيطر عليا..

أنا : مرادي معرفة صاحب العزيمة المبسط للفهم المسير لرباب 
ابنة سي الكرواعي السالكة للنفق طاردة الخوف والفزع 
المتحكمة في ربوع السكان المستوطنون المحتلون للظلام في أرجاء القبيلة
صاموي.. : رباب ابنة سي الكرواعي لا تستعين بأي من أصحاب العزيمة 
ولا تحتاج لمخلوق غازي لأنها تملك مفاتح علم الحرف والأوفاق والطلاسم 
المكونة من الحروف المجزأة المنادية لكبير العفاريت الزرق سيدي "شمهطاش"
أنا : "مذهول" شمهطاش؟؟ كبير العفاريت الزرق؟ وما هو مصدر تلك المفاتح ؟
صاموي.. : مصدرها الربع الأخير من كتاب "باب الكسبان لنيل ود الشيطان"

تفاجئت بهاذ الجواب.. الربع الأخير لي ناوي نخرج نقلب عليه 
ونجول القبائل حتى نلقاه  لا نلقا معلومة عليه.. 
كمالة الكتاب الإبليسي لي عندي كاين عند رباب؟ فين لقاتو؟

أنا : كيف حصلت رباب عليه وأين تخفي ذلك الجزء ؟

كريميطة حرك يدو ليسرية وتكا عليها أولا راسو عوج وعينه ليمنية لفوق..

صاموي.. : الربع الأخير حصلت عليه بجوار البئر عند حفره.. 
أما المكان الذي تخفي فيه الجزء فهو..

فهاذ اللحظة زلقات يد كريميطة وطاح على كتفو وفنفس الوقت 
طفات الشمعة الخامسة لي كان شاعلة بوحدها و ظلامت البيت.. 

 صقلت شويا نشوف ردة الفعل ونتسنى واش غا يكمل "صاموي.." كلامو لكن..
يتبع

بانتظار تفاعلكم و آراءكم و انتقاداتكم..

no_sidebar