أنا : نعام أكريميطة.. آش داكشي ؟ دخل لعندي
كريميطة : محالش ندخل.. مزلوف تخلع و مشى
أنا : تسنى نخرج لعندك

خرجت و درت لورا الدار و لقيت كريميطة كا يقفقف..

أنا : أتا مالك مرعود ؟ مازال كاعما بدينا
كريميطة : مزلوف ما نعرف مالو ؟ واقيلا شاف شي حاجة
أنا : غير دارها سبة و سلت.. ما سخاش بفراشو باقي سخون
كريميطة : "تلفت بجنابو" لا.. شاف شي حاجة حيت فرمشة عين غبر 
من قدامي
أنا : أرى ذاك الغراب و ذيك الجنوية

عطاني كريميطة الغراب و الجنوية و خنزرت فيه..

أنا : يلاه دابا سير لحق على مزلوف قبل ما تشير ليا هنا و نصدق طايف 
بيك أضرحة الأولياء..

دخلت و خليتو واقف بلاصتو مصدوم ورجعت للبيت الصغير.. كلست 
حطيت الغراب وسط النجمة الخماسية لي شكلو الشمعات وشديت الجنوية 
باليد اليمنى وهزيت القلم غطستو فالصمغ و كتبت على الجنوية..

"أقسمت عليك يا مخبا.. بسم الله الرحمن الرحيم الحي القيوم الرحمن الرحيم .. 
آه ٍ آه ٍ آه ٍ آه ٍ اهيا قضا.. اشرخ.. اشرخ.. سما.. ٍ مساو ٍ آل ٍ مساو ٍ قوز.. ٍ قياب.."

شديت الغراب من منقارو و رفعت ليه راسو لفوق وحطيت ليه رجليه
فمركز النجمة الخماسية وهزيت جنوية.. 
فهاذ اللحظة دخل كريميطة.. قبل ما ينطق أشرت ليه يسكت و كلت ليه يجي حدايا..

قرب كريميطة و عطيتو جنحين يشدهم و بديت كا نقرا تعويذة 
فخاطري سبعة ديال المرات..

"حضور عجول منكوص.. بدون.. ولا.. قمقا.. بأمر.."

من بعد المرة السابعة دوزت الجنوية على رقبة الغراب وترش دمو على 
يدين كريميطة و على الفور طاح و غيب.. 
حطيت الغراب فبلاصتو فمركز النجمة باش يسيل دمو و ينجس البقعة 
وشعلت الشمعات لي بقاو بربعة وجريت كريميطة من يديه حتى تكيتو 
على الحيط وحطيت يدي ليسرية على جبهتو..

 بخيت ليه ريقي على شعرو وقريت عليه تعويذة الإستنصار لي غا تفيقو 
من بعد لحظات..
رجعت لعند الغراب لقيت البقعة تصبغات بالأحمر وشديت القلم غطستو فالصمغ 
وبديت كا نهز كل شمعة كا نكتب عليها طلسم بحروف بدون نقط..

"كما أفنى.. لا تتعالى.. كما أفنى.. لا تعمى.. بك يا.."

كملت 5 الشمعات وهزيت الغراب من رجليه حتى قطر منو الدم كامل 
و شديتو طفت بيه البيت 12 مرة و خرجت لحدا الباب رميتو لورا الدار..
رجعت كلست بلاصتي مربع رجلي وهزيت القلم غطستو فالصمغ 
ورسمت سداسية فيدي ليسرية و علمت على خانة فيها بالحروف المجزأة..

"ج ن ح د ش ه"

كل حرف منهم فخانة..

غمضت عيني وبديت كا نردد آخر تعويذة ديال الإستحضار 220 مرة 
وأنا كا نتمنى ما يفيقش كريميطة وأنا كا نردد فيها حيت.. 
غادي يتنفى عقليا طبعا..

"فتاقيل.. طماشيل.. قبيلة قمقابيل وملوكها.. امتثلوا وإلا نلتم نصيبكم من.. وما.. 
و لا تحضروا إلا بـ.. وبحضور الخدام المسلمين من.. والارواح بحق آل مقب.." 

 و{زُيِّنَ لِلنَّاسِ حُبُّ الشَّهَوَاتِ مِنَ النِّسَاء وَالْبَنِينَ 
وَالْقَنَاطِيرِ الْمُقَنطَرَةِ مِنَ الذَّهَبِ وَالْفِضَّةِ وَالْخَيْلِ الْمُسَوَّمَةِ 
وَالأَنْعَامِ وَالْحَرْثِ ذَلِكَ مَتَاعُ الْحَيَاةِ الدُّنْيَا وَاللّهُ عِندَهُ حُسْنُ الْمَآبِ }

كملت 220 مرة و صقلت لرمشة عين..

 فهاذ اللحظة كا نسمع صفير فوذنيا ليسرية و تنمل فيدي ليسرية 
كذلك و حسيت مع أني مغمض عينيا بلي الشمعة لي من جهتي 
كا تحرك عافيتها للجهة الحيط و كأن الريح كا تسوط فيها.. 
تسنيت توصلني الدعوة باش نعطي الإذن بالظهور لأني ما يمكنش 
ليا نحل عينيا إلا بعد تجسد "صمواي.."
يتبع

بانتظار تفاعلكم و آراءكم و انتقاداتكم..

no_sidebar