لكن ما عاودش نطق لهذا قلبت على البريكة حتى لقيتها 
وشعلت نفس الشمعة لي طفات ومشيت بسرعة لعند كريميطة 
قاديتو ينعس على ظهرو و تحسست التنفس ديالو و دقات قلبو.. أوووف.. 
باقي فيه الروح

قرصت كريميطة زوج مرات فجنبو لكن ما تململش.. طبعا ما خاصنيش
نصدر حتى صوت فهاذ اللحظة حتى نتأكد بلي "صاموي.." إما تصرف
أو نتاقل لبقعة أخرى أو.. باقي كا يطوف فشي ركنة داخل الخربة..

رجعت لبلاصتي و شعلت الشمعات لي بقاو بربعة وهزيت القلم كاعدت
بيه دم الغراب لي ولا بحال الورقة و بشويا خرجتو من النجمة الخماسية
ونط هزيتو ولحتو من ورا الدار فنفس البلاصة لي لحت فيها الغراب المذبوح
و رجعت كلست وشديت الصمغ خويت منو على يدي ليسرية
نغسل بيه السداسية المرشومة فيها..

فهاذ اللحظة تحرك كريميطة.. تلفت لعندو لقيتو تقلب على ليمن ديالو
وحال فمو كأنه.. فعلا بدا كا يتقيا..

هزيت شمعة مشيت حداه كاعدتو باش ما يوسخش حوايجو وضويت
على الخيلوطة لي خرجات من معدتو.. أووووه.. تقيا الدم.. ضاية ديال الدم..
حطيت الشمعة و بديت كا نفخ عليه بنفسي على نيفو
حتى طلع شهقة و تنفس مزيان و عينيه بداو يتحلو لكن..
باقيين بيضين و مومو لكحل غابر..

قررت نغامر و نصرفقو فحناكو بزوج مع أن الصوت غا يكون
قوي لكن هذا هو الحل باش يفيق..
صرفقتو فحنكو ليسر هو الأول.. ما فاقش..
صرفقتو فحنكو ليمن حتى هو.. لكن..
فهاذ اللحظة طفاو الشمعات ثاني بربعة وبقات غير لي جبت لحدا كريميطة..
من بعد سمعت حركة ريحية قوية دازت حدا النجمة لي أصابها النقصان
بعد ما خديت منها الشمعة..
القضية ما مسلكاش لأني مضطر لتصريف "صاموي.." واخا مازال
ما توصلتش بالجواب الثاني لي أنا محتاجو..

دخلت يدي فجيب فوقيتي هزيت الشمعة باش نضركها على الريح
ورجعت كا نتسكل حتى وصلت النجمة الناقصة وتحنيت
باش نحط الشمعة فبلاصتها لكن..
بسرعة البرق دخل واحد الطائر جاي قاصدني لهذا وتشت على ركابيا
و حطيت الشمعة وخرجت يدي من الجيب وطحت على ظهري..

قلبت بعيني فالسقف وفالقنات ديال البيت باش نشوف هاذ العجب
لي دخل و لي كان موجه منقارو لعنقي لكن ما بان ليا والو..
ها لي قلنا..

هاذ شي ما مسلكش واخا يمكن يكون الطائر لي دخل مولف يبات هنا..

تكاعدت كلست وتلفت ورايا نشوف فكريميطة وأنا نلقا..
الطير واقف فوق من راسو..
هزيت الشمعة لي شاعلة بشويا و ضويت بها جهتو و لقيت بلي هاذ الطائر..
غراب.. أه غراب..
بان ليا راسو ما زاكيش حيت مرة يميل لليمين ومرة لليسار..

صقلت و أنا مقابل معاه باش نكون على بال لا يعاود يهاجمني..
تسنيت للحظة لكن ما تحركش من فوق راس كريميطة..
حطيت الشمعة فبلاصتها باش تكمل النجمة الخماسية وهزيت البريكة باش
نعاود نشعل الشمعات بربعة وأنا كا نتلفت مرة مرة جهة الغراب لي توقف عن الحركة..

شعلت الشمعة الثانية و الثالثة و الرا.. لا ما شعلاتش..
البريكة تكوانسات بحال إيلا خرج الروسور من بلاصتو و طيح الحجرة..
هذا هو أتعس حظ يمكن يوقع فيه شي واحد فوقت ممارستو لمجال الماورائيات..

حطيت البريكة و هزيت شمعة شاعلة باش نشعل الشمعة الرابعة و الخامسة..
شعلت الرابعة وحنيت الشمعة فوق من الخامسة.. لكن..
كريميطة تكلم..
لا ماشي كريميطة..
هذا صوت "صاموي.."..
باقي متحكم فالأعصاب الدماغية ديال كريميطة.. المسألة تطورات للمس
ماشي غير تجسيد صوتي..

صاموي.. : "بصوت خشن" شمهطااااااش.. سيدي ومولاي.. قائد الجيش
الطيار وحامي قبيلة قمقابيل.. رافع أعلام ثاني الملوك المبجل وآمر الجان المعظم..
أأمر تطاع و كل حرف تنطقه بين العوالم السبعة يذاع..

هاذ التسليم بالطاعة موجه طبعا لـ "شمهطاش" قاهر جبابرة الإنس والجن.. لكن..
آش جاب هاذ الخطاب لهاذ الخربة ؟؟ ياكما ؟؟
لا محالش.. من سابع المستحيلات..

يتبع

بانتظار تفاعلكم و آراءكم و انتقاداتكم..

no_sidebar