اسماعيل : آاا.. فيه غير الما ديال العين.. باغينو الطلبة

هبط للكوزينة خذيت منها بريكة حطيتها فجيبي وخرجت لجهة الجامع.. 
قربت للباب و لقيتهم عاد قامو الصلاة و مشيت بزربة حتى وصلت ورا
 دار الضيافة و كلست شويا.. 
بعد لحظة سمعت حس شي خطوات دايزين من الطريق لي قدام دار الضيافة.. 
تحنيت شفت جهتها لقيت.. 
اختي راضية و فليفلة ديال رباب عاد راجعين.. هاذو غير الله يحضر فيهم السلامة.. 
ما بايناش عليهم السلاكة.. 
لي جاني عجب هو أن اختي راضية كبر من رباب بسنين مع ذلك دايرة 
فيها عقلها و كا ترافق معها.. شي عجينة فالكريشة..

فهاذ الأثناء كا نسمع صوت الطلبة كا يقراو الحزب ديال المغرب فالجامع.. 
نط و مشيت فالظلمة حتى وصلت للزنقة ديال الجامع ووقفت 
ودرت راسي عاد خرجت من الجامع.. 

"الله يغفر ليا"

بداو الناس كا يخرجو من الجامع و شي وحدين جايين لجهة دار الضيافة 
و كان من بينهم الحاج بوسريف "كزار القبيلة".. 
هاذ السيد عزيز عندي وكا نحتارمو بزاف حيت ملي كا نكلس معاه 
كا نستافد بزاف بحكم أنه شخص جوال وما كا يخلي حتى قبيلة و لا دوار 
لأنه كزار و كساب.. 
كا يبيع الخرفان و البقر و حتى الجمال فبعض الأحيان وفنفس الوقت كا يذبح 
ويبيع فالسواق و فالدواور و هذا لي جعلو يكوّن ثقافة عامة و كبيرة 
من خلال تعاملو مع مختلف الأجناس..

مشيت قصدتو و سلمت عليه..

أنا : كيداير أسيدي بوسريف ؟ واش الصحة لاباس ؟
بوسريف : الحمد لله أولدي عدنان.. على سلامتك و مبروك النجاح
أنا : الله يبارك فيك أسيدي بوسريف.. كاين شي جولة ولا السواق خوات ؟
بوسريف : لا أولدي.. السواق عمرها تخوا.. غير أنا لي عيان شويا 
هاذ اليامات ذاكشي لاش ولدي المختار تولى المهمة حتى يجيب الله العفو من عندو
أنا : كاين ش خبيرة أسيدي بوسريف ؟ رانا توحشت الكرينات و قضية 
الصفايح لي بقاو معلقين فباب المقبرة
بوسريف : "ههه" واخا أولدي عدنان.. خلينا حتى تفوت هاذ السلكة 
ونديرو شي كلسة.. را عندي شلا ما يتعاود خصوصا على الكتاب لي عندك ناقص..
 راني سمعت على كمالتو شي خبار ما تفرحش

عقدت حجباني و قربت ليه من بعدما تلفت يمين و يسار لا يسمعني شي واحد..

أنا : "بهمس" أش من خبار أسيدي بوسريف ؟
بوسريف : "بهمس" ماشي دابا أولدي عدنان.. الليلة محسوبة على منطقة 
قمقابيل و بغينا السلكة تدوز على خير حيت القضية 
عندها علاقة بدار سي الكرواعي.. 
كاينة شي خيوط مشبكة عندو و هي لي مرتابطة بمسألة البير المسكون
أنا : سيدي بوسريف.. راك عارفني ما كا نخبيش عليك حتى حاجة متعلقة 
بأعمالي الماورائية.. لهذا راني كا نوجد طلسم "الناروزي" المضاد 
لجميع التعويذات لي يمكن يكونو تخدمو فالبير.. 
ومادام أنك عرفتي بلي قضية سي الكرواعي مشبكة خيوطها.. 
أنا غا نكول ليك بلي المصدر الوحيد ديال هاذ التعويذات هو.. 
رباب بنت سي الكرواعي

استغرب سيدي بوسريف و جرني من يدي حتى بعدنا على الزنقة 
ووقفنا من ورا واحد السور طيني مظلم..

بوسريف : آش كا تكول أولدي عدنان ؟ واش يحساب ليك حيت أنت 
مهتم بعلم الماورائيات را كاع دراري ولا دريات لي فعمرك 
ولا صغر منك فالحين فيه ؟؟ 
را غير الكتاب الإبليسي لي طاح بين يديك هو لي نافعك وعاطيك التحصين المنيع
لهذا حيد فكرة أن رباب بنت سي الكرواعي غادا تكون دخلات هاذ 
العالم المظلم من دماغك.. 
و ما تنساش بلي علم الأوفاق وعلم الحرف لي بيهم كا يتشكلو الجداول 
ما ليهمش مهمات محددة توافقية
أنا : هاذ شي كاع لي كلتي أسيدي بوسريف صحيح.. لكن لي نتا ما تعرفوش 
هو أني الليلة لي فاتت وفالوقت لي نتا كالس فيه كا تفرج فأحواش فأسايس 
كنت أنا كا نعمل تجربة بتعويذة المرايا لرباب 
وكتاشفت تواصلها مع خدّام ماشي غير خادم
بوسريف : عدنان.. ايلا بغيتي تبقا عزيز عندي أولدي ونوصل ليك 
المستجدات لي كا نحصل عليها من العلماء و الشيوخ ديال الأضرحة 
و المدارس العتيقة.. 
بعد على الأعمال المتعلقة بالعالم السفلي و خصوصا هاذ الليلة
السيد وجد للسلكة وعرض على الناس للعشا والطلبة غاديين يمشيو يقراو 
التفريق من بعد صلاة العشاء لي بقا ليها أقل من ساعة 
ورا وصا الإمام خوك اسماعيل يجيب الما المانع باش يحصنو الدار و البير.. 
يعني أنت تقدر تسبب ليهم فالتباطيل
أنا : خويا اسماعيل.. ؟؟ آه فهمت.. لكن أسيدي راني حتى أنا وجدت للكلسة 
الروحانية و مشى لي يجيب جلد الضب لي غا نبخر بيه الجواد

سكت شويا و كال ليا سيدي بوسريف..

بوسريف : حتى دابا أولدي راك باقي ما درتي فالطاجين ما يتحرق
أنا : ايلا ما درتوش غادي يتحرق غادي يتحرق.. رباب ناوية 
على خزيت و راها جرات معها حتى ختي راضية.. خاصني أنا نعرف 
مصدر الإستنزال لي قامت بيه ليلة البارح.. وحاجة أخرى ما متيقنش منها 
وهي واش كانت فكامل وعيها ولا لا
بوسريف : راسك قاصح.. المهم.. ايلا تبطل عمل الطلبة الليلة راك ما تلوم 
غير راسك.. و الطلسم لي غا تستاعن بيه غا يضرك كثر ما غا يفيدك.. 
ونعاود نفكرك.. الليلة هي الثانية من 22 ليلة كا يصعدو فيها شياطين الجن 
لي تابعين لكل ملك من الملوك السبعة.. 
ياك فراسك بلي لي دار تباطيل و لقاوه محصن بتعويذة "الإستنصار" 
كا يقصدو مباشرة أقرب و أعز الناس إليه ؟

فهاذ اللحظة سمعت كريميطة جاي كا يهضر مع شي حد.. 
خرجو من الزنقة و أنا نلقا معاه.. مزلوف.. 
واقيلا محال واش مشى لشي بلاصة..ااوووه.. 
غا نصدق داير بكلام سيدي بوسريف..

أنا : غير كون هاني أسيدي بوسريف.. ذاك لي عولنا عليه يجيب لينا 
جلد الضب ما قضاش الغراض
بوسريف : الحمد لله.. عبر عليك

خرج سيدي بوسريف من الظلمة و مشى قصد دار الضيافة 
وخرجت حتى أنا و بنت لكريميطة و مزلوف و تمو جايين لعندي 
لكن أنا درت بحال إيلا ما شفتهمش وهبط للطريق لي كا تدي لأسايس..

كريميطة : عدنان.. عدنان.. بلاتي أصاحبي فين غادي ؟

درت راسي ما سمعتوش و أنا مغوبش حيت ما قضاو حتى غراض.. لكن.. 
جاو بجرا لعندي حتى وصلوني..

كريميطة : أمالك صمك ؟ آش هاذ لعب ديال المزعزعين ؟
مزلوف : غا باغي يسلت علينا.. تلقاه جاب داكشي لي خاصو من بلاصة 
أخرى و بغا يسوسنا
أنا : نتوما غير سكتو.. سيرو لبسو جلالبكم تقراو مع الطلبة.. خدمتي صعيبة عليكم
مزلوف : هاذي هي ديال "بوس الكنفوذ.. آش قربك لشوكو".. واش كا تفلا 
علينا ؟ وهاذ جلد الضب لي سخسخت البغلة على قبلو آش غا ندير بيه أنا ؟

جبد ليا الجلد ديال الضب و شفتو و بقيت غير حال فمي..

كريميطة : و هاذ الغراب لي ما خليت شجرة فالجنان الا وطلعت ليها 
ونصبت فيها الفخ و الشبكة و قلبت العشاش حتى شديتو.. نتعشا بيه ؟

يتبع

بانتظار تفاعلكم و آراءكم و انتقاداتكم..

no_sidebar