عصوم : "ههه" شمس المعارف أولدي كا يحتوي على علم الحرف والرقم 
والأوفاق و دور أسماء الله الحسنى فالروحانيات.. 
و كولشي فيه مضبوط لوضوح السبل المتبعة فالإستحضار والتصريف.. غير 
كا يتطلب المستعين يكون متمكن و عندو خبرة خصوصا فصرف الخادم 
والتعامل مع رئيس كل طائفة من الجن خاصةً طوائف العالم السفلي.. 
أما الكتاب لي كا ندوي عليه.. كا يتعتابر أخطر ما وجد على وجه الأرض

أنا : أسميتو أسيدي عصوم..؟

شد سيدي عصوم الكتاب و دورو لجهتي و قربو ليا لوجهي.. 

عصوم : قرا سميتو فالغلاف واخا ما واضحاش

شديت الكتاب و بديت كا نحقق فيه.. العنوان مضبب

عصوم : ما فرزتيهش ؟
أنا : باااب.."مصدوم" 
عصوم : كمل..باب..
أنا : ما واضحاش الكمالة و لكن.. ياكما..؟!!
عصوم : ياكما آش..؟ كمل كلامك أولدي
أنا : بغيت نكول أسيدي.. ياكما باب الكسبان لنيل ود الشيطان ؟
عصوم : "مستغرب" راسك عامر و كبر من سنك.. فين سمعتي بيه ؟
أنا : من عند سيدي عبد السلام.. و على قبلو هاجرت لهاذ المكان.. لعل وعسى 
ناخذ الإذن ونكشف البرهان.. باش نستاعن بباب الكسبان لنيل ود الشيطان
عصوم  :"غاضب" إذا على قبلو رسلك سيدي عبد السلام..؟
أنا : أييه أسيدي عصوم.. كال ليا راك غا تكلف بتوجيهي و دعمي 
باش نبات الليلة فغار الهمدج
عصوم : القضية أولدي ولات مشبكة.. والمباتة فالغار ما مسلكة
أنا : على قبل الكتاب أسيدي نغامر.. و على قبل اختي سامية نشعل كاع المجامر
عصوم : أش كا تقصد أولدي ؟ ياكما اختك حتى هي داخلة المعمعة ؟
أنا : اختي هي سباب القصة كاملة.. قاسها الجن العاشق أو سيطر على ليلها.. 
ولات من المغرب تدخل وتسد عليها بيتها
عصوم : "مستغرب" العاشق ؟ حالو ساهل.. كان عليك تخبر سيدي عبد السلام 
وفرمشة عين يصرعو
أنا : فراسو أسيدي عصوم.. لكن بدا كا يماطل.. يمكن حيت هاذ الأيام 
مشغول مع واحد الكنز
عصوم : "ههه" ايلا كان غير هو را ديما مشغول مع الكنوز.. المهم دابا 
خاصك تعرف بلي المسألة عندك معقدة حيت الغار ما معاه ملاغة.. أرى 
نشوف يديك

بسطت يدي بزوج قدام سيدي عصوم و قلبهم و عبر الخط لي دايز من وسطهم.. 

عصوم : "ممم" الجزء الأول من الليل ما يمكنش ليك تدوزو فالغار 
بوحدك.. خاصك رفاكة
أنا : كاين صاحبي عامر أسيدي.. را جا معايا حتى لدوار المزاكدة لكن فالطريق 
مرض و عيا.. داكشي لاش ما قدرش يكمل معايا.. إنما كاليا غادي يلحق عليا 
لهنا.. و ديك الساعة نمشيو أنا و اياه للغار
عصوم : ما كا نظنش.. لي غا يمشي معاك خاص تكون متوفرة فيه مواصفات معينة
أنا : بحالاش أسيدي عصوم ؟

ناض سيدي عصوم من بلاصتو و مشى لحدا الباب المقوس..

عصوم : خاصو يكون زوهري

خرج سيدي عصوم من الغرفة للمقر وخلاني مدهوش.. بعد لحظة نط مشيت
 لحقت عليه للمقر.. لقيتو كلس بلاصتو هاز القلة كا يشرب منها و من بعد 
حطها حداه و بدا كا يضرب ثاني كرشو و كا يتسمعو مصارنو كا يغرغرو 
وفنفس الوقت تكرع..

كلست على ليمن ديال سيدي عصوم و ربعت رجلي..

أنا : ضروري من هاذ الشرط أسيدي عصوم؟
عصوم : رجع للبيت جيب ليا الكتاب لي خليت فيه

نط و مشيت جبت الكتاب و رجعت كلست حداه..

أنا : ها هو أسيدي

شد سيدي عصوم الكتاب و حلو على الصفحة لي فيها صورة غلاف 
كتاب باب الكسبان لنيل ود الشيطان و قلبها للصفحة الموالية..

عصوم : هاك قرا أولدي هاذ الفقرة

شديت الكتاب و بديت نقرا الفقرة لي كان عنوانها.."حراس الهمدج"

أنا : على كل طالب للعلم أن يجتهد في أبحاثه و ينوع مصادره لتوسيع دائرة 
تلقي المعرفة بشكل يمكنه من بلوغ المراحل المشرفة و ذلك بتصفح الكتب 
العلمية مع تفضيل الإستعانة بشيخ مشهود له بالكفاءة و الإجتهاد..
 و لعل أبرز مثال نستدل به هو التمكن من إستغلال أبحر التنجيم و علم 
الإستنزال و كذلك الفخاخ و ما يتضمنه الكتاب الأخطر في الروحانيات 
والحاجب لعالم الماورائيات.. 
كتاب باب الكسبان لنيل ود الشيطان و الذي يستعصي على أي شخص 
مطالعة صفحاته إلا بعد التماس الإذن من حراسه وإرضاء حامله مع توفير 
المتطلبات اللازمة لإنهاء المهمة بالوسيلة الناجعة و التي تنهج جميع المراحل
 بشكل صحيح كالإستعانة بصحبة جديرة بالثقة وذات الخط الكفوف الواصل 
الموصول بالتمام و الكمال الخالي من أي سمات مبطلة للعزيمة منفرة 
للإلهام جالبة لأذى الحارس ليلة الإستئذان..

عصوم : حسبك

توقفت عن القراءة و شفت فسيدي عصوم..

عصوم : التوجيه واضح و لا كا يحتاج لتفسير ؟

خذا القلة و بدا يشرب منها..

أنا : هاذ المقتطف واضح أسيدي عصوم لأن جميع مصطلحاته في المتناول.. لكن.. 
ما فهمتش الجملة الأخيرة لي ذكرات سمات مبطلة للعزيمة
عصوم : "تكرع" الوليمة ديال البارح ندماتني.. غا نولي ندير بناقص

غوبشت فوجه سيدي عصوم حيت نقز موضوع الكتاب لي كا نهدرو 
عليه لموضوع الوليمة و المصارن..
لكنه عاق براسو بلي وضر الموضوع داكشي 
لاش ابتاسم و كال ليا..

يتبع

بانتظار تفاعلكم وتشجيعكم للكاتب

 no_sidebar